bilqees paasbaan hai ye kiski janaab hai
maryam duroodqan hai ye kiski janaab hai
shane khuda ayaan hai ye kiski janaab hai
dehleez aasman hai ye kiski janaab hai
     kursi zameen se leti hai goshe panaah ke
     baitha hai arsh saaye may kis baargah ke

ulfat khuda ke baad habeebe khuda ki hai
munsif ke paas ye bhi vila kibriya ki hai
parwa na faaqe ki na shikayat ghiza ki hai
eeza faqat judaai-e qairulwara ki hai
     aabo ghiza ki fikr na sone ka dhyan hai
     ankhon may shakl baap ki rone ka dhyan hai

bete pukaarte hai ke lillah baahar aao
amma na itna ro'o ghulamon pe rahm khao
nana kahan gaye hai bula laye hum batao
hum kapde phaadte hai nahin to gale lagao
     nana ke baad haaye ye beqadr hum huve
     sab ek taraf huzoor ke bhi pyar kum huve

aaqir wafoore girya se aajiz huve arab
hyder ke paas rone ki faryaad laaye sab
ki arz fatima se kaho ae wali-e-rab
ya sayyeda tumhari raiyath hai jaan balab
     khane ka koi waqt na sone ka waqt hai
     jo waqt hai woh aapke rone ka waqt hai

baher se murtuza gaye ghar may jhukaye sar
moo dhanpe ro rahi thi akeli wo qushsiyar
dene lage payame arab shahe bahrobar
ghabrake boli haye karoon kya mai be-pidar
     maabu may mauth huve to marjaaon ya ali
     baba ka soag leke kidhar jaoon ya ali

meri taraf se ahle madine ko doh payam
logo qafa na ho meri ruqsat hae subho-shaam
doh chaar din tumhare mohalle mein hai maqaam
ronay ki dhoom ho chuki ab kaam hai tamaam
      ghabrati hoon watan mein safar ke maheene se
      baba sidhaare kaam mujhe kya madine se

ek din nigah karte hai kya shahe la-fatah
mathbaq hai garm aaridey joh hai gundha hua
nahla rahi hai bachon ko mal mal ke dast-o-pa
phaila diye hai kurte bhi dho kar juda juda
     poocha ke itne kaamon ka jo shagl aaj hai
     is waqt kuch bahaal tumhara mizaaj hai

boli ke aaj raat ko ho jaungi bahaal
kal mere kaarobar may turn honge qud nidhaal
qidmat ka mere bachon ki hoga kise khayaal
nehla dhula diya ke pareshaan tha unka haal
      kurte bhi dhoye khooth bhi kal tak ka de chali
     sehra na dekha ek ye armaan le chali

phir toh har ek mohalle may mahshar bapa hua
apne paraaye daude ke hae hae ye kya hua
fizza pukari sayyeda ka waaqia hua
hujra batoole paak ka maatam sara hua
     chaati qalaq se dekhne waalon ki phat gayi
     moo rakh ke moo pe murde ke zainab lipat gayi

mai doodh baqshwane na paayi ke chal basi
sharbat bana ke laane na paayi ke chal basi
kuch haale dil sunane na paayi ke chal basi
mai be-naseeb aane na paayi ke chal basi
     kya jald tar zamana hua inteqaal ka
     hae hae abhi to sin tha kul athara saal ka

ay meri faaqa kash meri nadaar amma jaan
ay meri be-dawa meri beemar amma jaan
kaabe ki aabroo meri sardaar amma jaan
ay meri sabera meri nachaar amma jaan
     nana moovi to thi koi taaza qitaab do
     amma jawab do meri amma jawab do

nanhe se sar khule hai nahin sar pe topiyan
kehte hai kuch to moo se nikalta haaye maa
likha hai jab janaze pa pahunche wo neem jaan
hasrat se dekha murde ka moo aur ye ki fughaan
     amma ghulam aaye hai ruqsat ke waaste
     jaati ho tum nabi ki ziarat ke waaste
Marsiya - Bilqees Paasban Hai

Reciter: Alamdar Razvi
Download mp3
Listen Online