Qeta'at
(by Hilal Mirza)

_______________________________________

1. MATIMI

bakshish ki baat usko madine mein milgayi,
aal-e-rasool-e-haq ke safine mein milgayi,

khoo_n ki jaza to hashr mein dega usse khuda,
jannat to matami ko pasine mein milgayi.
_______________________________________

2. MERAJ

wajib ne bohat dear ki imkaan se batie_n,
jis shaan ka mehmaa_n hai wosi shaan se batie_n,

ki khaliq-e-kaunain ne meraj ki shab mein,
quraan ki awaaz mein quraan se batei_n.
_______________________________________

3. AQEEDAT

shah tak yoon aqeedat ka dhara gaya,
ansoowoo_n ki zabaa_n mein pukara gaya,

jab ziarat pardi faasele chat gaye,
karbala tak hamara ishara gaya.
_______________________________________

4. IMAAN

imaan ka ho saamne meyaar hameesha,
nazroo_n mein rakho kaabe ki deewaar hameesha,

rehjayega ta hashr tere aane se aai maut,
ankhoo_n mein rukhe haider-e-karaar hameesha.
_______________________________________

5. 13th RAJAB

deen-e-islam ki wo banke rag-e-jaa_n aaya,
aayatei_n shaad huwi, bolta quraa_n aaya,

muskurakaar yahi kahne lagi kaabe ki jidaar,
ghar mein allah ke allah ka mehmaa_n aaya.
_______________________________________

6. 13th RAJAB

shukre haq warise anbiya aagaya,
dono aalam ka muskilkusha aagaya,

muskurakar ye boli jidare haram,
jaa_nashine rasool-e-khuda aagaya.
_______________________________________

7. A’NSOO

a_nsoo chamak raha hai sitara bane howe,
romaal-e-fatima mein hai tara bane howe,

bakshish ka meri hogaya samaan ab hilal,
kausar hai ek a_nsoo ka qatra bane howe.
_______________________________________

8. HAZRAT ABASS A.S.

tashnalabi ka zamzam-o- mawa bane howe,
rouza hai unka mashk-e-sakina bane howe,

paani tawaf karta hai marqad ka aaj tak,
abass hain furat ka kaaba bane howe.
_______________________________________

9. PYAS NE DARYA PE QABZA KAR LIYA

tashnagi ka bol-bala kar liya,
pyas ne darya ko pyasa kar liya,

roz-e-ashoora se roz-e-hashr tak,
pyas ne darya pe qabza kar liya.
_______________________________________

10. IMAM-E-ZAMANA A.J.T.

ziarat mein imam-e-asr ki gar tool hojaye,
meri ye zindagi sookha howa jab phool hojaye,

meri turbat pe rakhkar paoo_n wo guzre agar to,
ye khaaki jism bhi unke khadam ki dhool hojaye.

_______________________________________

11. WAFA

karke roushan bazm mein sham-e-shabistaan-e-wafa,
toal kar sab ke diloo_n ko karke ealaan-e-wafa

kaun kitna hai wafadar-e-shahedee_n jaan lo,
hazrat-e-abass ka parcham hai mezaan-e-wafa.
_______________________________________

12. JANAB-E-ALI ASGHAR A.S.

dil mein ye sooch te hi dard siva hota hai,
jhule wale pe bhi kya zulm rava hota hai,

lashe asghar pe yehi kehti thi ro ro ke rabab,
kya kahee_n teer nashane se bada hota hai.
_______________________________________

13. TEER KI GARDAN:

nazook thi bohat asghar-e-besheer ki gardan
asghar se bachi maqsad-e-shabbir ki gardan

dil thaam ke sunlijiye allah re wo thi,
besheer ki gardan se badi teer ki gardan.
_______________________________________
Providing writeups (English text) & audio (Mp3) of all urdu nohay, new and old