hai kahan bhai mera ay zuljana
zuljana zuljana zuljana
hai kahan bhai...

zeen khali aur rakabon se tapakta hai lahoo
tujhse aati hai ghareebe karbla ke khoon ki boo
kya sakina ki yateemi ki khabar laaya hai tu
khoon hai maathe pe ye kiska mala
zuljana zuljana zuljana
hai kahan bhai...

haal aaqa ki musibat ka suna de zuljana
ek behan ko uske bhai se mila de zuljana
raah e maqtal binte zahra ko dikhade zuljana
dhoondne jaaye kahan sheh ko bhala
zuljana zuljana zuljana
hai kahan bhai...

wa hussaina ki sadaye hai fiza may kis liye
surkh aandhi chal rahi hai karbala may kis liye
baj rahe hai shadhiyane ashkiyan may kis liye
shamiyon may shor hai kaisa bata
zuljana zuljana zuljana
hai kahan bhai...

dil bahot betaab tha aaya hai jab se naama-war
yaad sughra aa gayi kya naujawan ki laash par
ladte ladte pad gayi kya zakhmi seene par nazar
laash par akbar ki kya ghash aa gaya
zuljana zuljana zuljana
hai kahan bhai...

chain kaise bhai ke bin ghar may payegi behan
teero naizon barchio ke zakhm khayegi behan
apne bhai ko utha kar ran se laayegi behan
ye bata tashna dahan kis jaan gira
zuljana zuljana zuljana
hai kahan bhai...

laut kar wo ghar na aaya aaj maqtal jo gaya
fatema ka chand bhi kya nainawa may kho gaya
shaam se pehle takallum kyun andhera ho gaya
kya diya qabre nabi ka bujh gaya
zuljana zuljana zuljana
hai kahan bhai...
Noha - Zuljana Hai Kahan
Shayar: Mir Takallum
Nohaqan: Mir Hassan Mir
Download Mp3
Listen Online