ghuroore fauje sitamgar ko tod sakta hoo
rukhe furaath nigahon se mod sakta hoo
ali ka beta hoo maujiz numayion ki qasam
mai aaftab se pani nichod sakta hoo

mera abbas alamdar, ghazi abbas alamdar

maniye riqqat e esaar o wafa hai abbas
jazbaye hauslaye sher e khuda hai abbas
roohe ehsase rasoole do sara hai abbas
yani allah ke maqsad ki baqa hai abbas
raasta rehbare islam ka rukne na diya
katgaye haath alam deen ka jhukne na diya
mera abbas alamdar, ghazi abbas alamdar

mai jo ejaaz dikhaun to ye naksha badle
arsh pe fasl ugay farsh pe suraj nikle
nehr se gard uday sang se chashma poothay
aag pani may lagay aag se pani nikle
ghoor ke dekhun to tum sab be mamaach aajaye
mere toote huye naize pe furaath aajaye
mera abbas alamdar, ghazi abbas alamdar

meri talwaar se jibreel ke par kaampte hai
meri haibat se sabhi jinn o bashar kaampte hai
tum to kya cheez ho sheron ke jigar kaampte hai
maut se pehle hi ajsaam ke sar kaampte hai
maine talwaar jo ek baar chalayi hoti
saari dunya may duhaai hi duhaai hoti
mera abbas alamdar, ghazi abbas alamdar

jung e siffaein ka maahol dubara hojaye
khaynchloo taygh to dunya may savera hojaye
alqama ko jo mera ek ishara hojaye
qaimaye shah hi darya ka kanara hojaye
qatm pyason ki abhi tashna dahani kardoo
mai agar chahoo to pahadon ko bhi pani kardoo
mera abbas alamdar, ghazi abbas alamdar

poore maqtal ko ek ungli pe nacha sakta hoo
tum jo mar jao to thokar se jila sakta hoo
aag behte huye pani may laga sakta hoo
tumko ab roo ke ishare se bhaga sakta hoo
haath katne pe bhi ladne se mai maazoor nahi
hukme shabbir ka paaband hoo majboor nahi
mera abbas alamdar, ghazi abbas alamdar

ha magar gardishe dauran ne ye manzar dekha
katgaye baazu e abbas sare raahe wafa
sar pe bhi gurz laga aankh pe bhi teer laga
aas bhi toot gayi mashk se pani jo baha
ho salaam aap pe aaqa ye pukaare abbas
nehr se jaanibe firdaus sidhaare abbas
mera abbas alamdar, ghazi abbas alamdar

jab suna nehr pe saqqaye haram maara gaya
gir gayi bibiyon ke sar se ye sunte hi rida
bibi zainab ki sada aane lagi wavaila
gir gaya dashte sakina se zameen par kooza
boli ye roke mujhe aas nahi hai ammu
jald aajao ke ab pyaas nahi hai ammu
mera abbas alamdar, ghazi abbas alamdar

roke shabbir pukaare mere bhaiya abbas
mere ghamkhwar mere aashiqo shehda abbas
mujhko pani to pilado mai hoo pyasa abbas
mai gira jaata hoo do mujhko sahara abbas
qaimaye fatema zehra ki sipar tooth gayi
haath bhai ke kate meri kamar toot gayi
Noha - Mera Abbas Ghazi Abbas

Nohaqan: Shadman Raza
Download Mp3
Listen Online