kya likha fatima sughra ne bataya na gaya
sheh se khat laashaye akbar pe sunaya na gaya

sheh ne chaha to bahot zakhm magar itne thay
laasha abbas ka darya se uthaya na gaya
kya likha...

jab talak aa na gaye saare sharabi tab tak
saaniye zahra ka darbar may laaya na gaya
kya likha...

dekha sairaab zabeehe ko to bolay sajjad
mere baba ko to pani bhi pilaya na gaya
kya likha...

ek shabbir ki beti ke siwa dunya may
kisi masooma ko naaqe se giraya na gaya
kya likha...

bheed is darja thi haste huwe logon ki wahan
sar bhi bazaar may abid se uthaaya na gaya
kya likha...

baap ka sar jo mila soyi lipat kar aisay
maa se bhi baali sakina ko jagaya na gaya
kya likha...

mir sajjad shahe deen se ali asghar ka
chehra jalti hui reti se chuapaya na gaya
kya likha...
Noha - Kya Likha Fatima
Shayar: Mir Sajjad
Nohaqan: Mir Hassan Mir
Download Mp3
Listen Online