jo pahuncha asr ko dashte bala may zaafare jin
ghira ajeeb ghame naarwan may zaafare jin
haye sitam wo dekhta hai karbala may zaafare jin
ke mubtela hua gham ki faza may zaafare jin
bahot hi tanha shahe khushkisaal ko dekha
ke choor zakhmo se zehra ke laal ko dekha

jo pahuncha asr ko karbobala may zaafare jin

machal ke zaafare jin ne nikaal li talwaar
buland karta tha jismi lakal fida ki pukaar
hussain ko jo ye manzar nazar pada ek baar
pukar kar kaha zaafar na kar abhi paykaar
bala ke ban may na hum yun ladaayi chahte hai
khuda se ummate jad ki bhalayi chahte hai
jo pahuncha asr ko....

khareeb aagaya ye hukm sunte hi zaafar
nazar pada usay andohnaak ek manzar
ke zuljanaah ki thame lajaam hai hyder
amama sar se utaare khade hai payghambar
wahan thay nooh zabiho khaleel aaye huwe
khade thay musa o eesa bhi sar jhukaye huwe
jo pahuncha asr ko....

qadam ko choom ke sheh ke pukaara ye zaafar
mere imam mere moqtada mere rehbar
lahoo rulaata hai mujhko ye khoon fashan manzar
na jaanisar koi aur na nasir o yawar
na lashkare na sipahe na kasratun nasir
na qasime na ali akbare na abbase
jo pahuncha asr ko....

hussain legaye zaafar ko tab suye maidan
to dekha sota hai darya kanare ek jawan
kate hai haath to shano se bhi hai khoon rawan
kaha hussain ne zaafar se ba dile giryan
hai hasraton ka badan ye yaas ka laasha hai
hamari jaan ka abbas ka ye laasha hai
jo pahuncha asr ko....

hussain tab suye maqtal chale maye zaafar
wahan zameen pe laashe jawan aayi nazar
hussain bolay ye hai hum-shabihe payghambar
hamare jaan o jigar aur hamare noor e nazar
jigar pe naiza laga pusht se huwa baahar
sina ke saath kaleja bhi aagaya baahar
jo pahuncha asr ko....

jo poocha zaafare jin ne ye ghatri may kya hai
hussain roke pukaare ke ek dulha hai
mere aqi hassan-e-mujtaba ka beta hai
sitam se ghodon ki taapon ne isko kuchla hai
hai sehra haath may khwahar bhi intezaar may hai
dare qayaam pe madar bhi intezaar may hai
jo pahuncha asr ko....

kaha hussain ne ab tu yahan se jaa zaafar
jo ambiya bhi yahan hai na koi tehre idhar
faqad rahe yahan mere nana payghambar
rahenge bhaiya hassan aur rahega mera padar
bala ke dasht may ahmed ki pyari aati hai
falak se ab meri maa ki sawari aati hai
jo pahuncha asr ko....

ba waqte asr chali karbala may tez hawa
malaayeka bhi ye utre sawari e zehra
pisar ko bibi ne badkar galay se liptaya
rakha hussain ne zaano pe maa ke sar apna
kaha mujhe wohi lori sunado ay amma
ke neendh aati hai mujhko sulado ay amma
jo pahuncha asr ko....

bayan ho kaise ay majid wo khoon fashan manzar
dobara dasht may aaya palat ke jab zaafar
to dekha chal gaya halqoo shah pe khanjar
baland naize pe tha shadman hussain ka sar
machi thi loot nabi ke khayaam jalte thay
saron ko peeth-te ahle haram nikalte thay
Noha - Jo Pahuncha Asr Ko
Shayar: Majid Raza Abdi
Nohaqan: Shadman Raza
Download Mp3
Listen Online