abbas e dilawar maqtal may be-izne wigha jab aayega
toofan uthega darya may aur darya se takrayega
maqtal ki fazaon ko phir se ek baar ali yaad aayega
ashoor ka suraj dekhega...

ashoor ka suraj dekhega shane pe saja hai mashkeeza
aayega jari haathon may liye bas ek alam aur ek naiza
jab ghaat ka pehra tootega dil zaalim ka ghabrayega
ashoor ka suraj dekhega...

saahl ki hawa ki thandak may ghoday ka badan jab kaampega
bechain sumon ki taapon se jab darya thar thar kaampega
jab abr ki soorat darya pe ek tashna dahan chajayega
ashoor ka suraj dekhega...

jab maujein behti darya ki uth uth ke raqabay choomengi
jab garm hawaein pyason ke qaimo ki tamaway choomengi
jab aab rawan ke seene pe ghazi ka alam lehrayega
ashoor ka suraj dekhega...

pani may girega mashkeeza jab katne wale haathon se
kat kar bhi apne maqsad se na hatne walon haathon se
jab ghurte nidamat se darya mashkeeze may aajayega
ashoor ka suraj dekhega...

gham dil may sambhale bachon ke haathon ke larazte koozon ka
jab pani lekar palthega qaimo ki taraf sardare wafa
be taygh jari ke seene pe har simt se hamla aayega
ashoor ka suraj dekhega...

jab gurz lagega chehre pe jab shane girenge kat kat kar
jab khaak udegi maqtal may jab laash bahegi matti par
jab mashq chidegi teeron se dil saqqa ka phat jayega
ashoor ka suraj dekhega...

jab ghazi kahega maula se ek baar hamiyat hai aaqa
qaimo may mujhe na le jaana bas itni wasiyat hai aaqa
gar laash gayi qaimo ki taraf sar zainab ka khul jaayega
ashoor ka suraj dekhega...

jab maula tanha lautenge aankhon may lahoo ke ashk liye
ek khoon may dooba surq alam teeron se chidi ek mashk liye
jab kooze girenge haathon se kulsoom ko ghash aajayega
ashoor ka suraj dekhega...

masoom sakina poochegi hai mashk o alam pe kiska lahoo
kyon laut ke wapas aaye nahi kyon laaye nahi pani ammu
ye sunke amma fizza ki aankhon may lahoo aajayega
ashoor ka suraj dekhega...

dil apna dhadakta hai mazhar  nafreej o ishqe karbal may
ye bhi hai karam un haathon ka jo haath katay thay maqtal may
jab ahle aza ke ashkon may har lafz mera dhal jayega
ashoor ka suraj dekhega...
Noha - Ashoor Ka Suraj Dekhega
Shayar: Mazhar
Nohaqan: Rizwan Zaidi
Download Mp3
Listen Online