ek do pahar may apna bhara ghar luta diya
allah kya jigar tha janab e hussain ka

zakhmi badan firaaq e pisar tashnagi alam
tanhaai fauj e shaam ka nargha naye sitam
ansar o aqroba ka bichadne ka dil may gham
qaime se aa rahi thi sadaye buka baham
allah kya jigar tha...

jab aaye izn lene ko abbas e ba-wafa
hasrat se unko dekh ke shabbir ne kaha
jao sidharo bhai nigehban hai khuda
hum jaante hai door nahi aap se khaza
allah kya jigar tha...

jis waqt ishteghasa e abbas ko suna
jaate thay ran may thokare khaate shahe huda
naagah ek simt may baazu pada mila
dil thaam kar hussain ne usko utha liya
allah kya jigar tha...

bhai ke baad ran may gaya naujawan pisar
barchi ne tukde kar diya uska dil o jigar
pahunche khareeb laash ke aur baithe khaak par
barchi jigar se khaynchi to haatif ne di khabar
allah kya jigar tha...

ayub dekho sabr e shehenshah e karbala
tanha jawan laal ka laasha utha liya
haathon pe leke qaime ki jaanib jari chala
dekha na hoga aisa kisi dil ka hosla
allah kya jigar tha...

sab fauj qatl hogayi ab koi bhi nahi
nargha kiye hai sham ke aada udoo e deen
barsa rahe hai teero ko har simt se layeen
haathon pe apne laate hai bano ka mehjabeen
allah kya jigar tha...

maidan may sheerkhwar ko laaye juhin hussain
khoya sipaah e sham ne apna sukoon o chain
paika galay se lipta hua kar raha tha bain
kis sabr se juda kiya wo shahe mashraqain
allah kya jigar tha...

dafna ke sheerkhwar ke laashe ko shahe deen
aaye khayam e zainab e kulsoom ke khareeb
lipti sakina qadmo se dil sog tha hazeen
baba na aap jaaiye kehti thi mehjabeen
allah kya jigar tha...

lipta ke apni beti ko sarwar ne ye kaha
sab hogaye anees o aizza mere juda
hum jaye qatl gaah may hai ye marzi e khuda
ran ko sidhaare kehte huwe shaah alwida
allah kya jigar tha...
Noha - Allah Kya Jigar Tha
Shayar: Anees
Nohaqan: Nadeem Sarwar
Download Mp3
Listen Online