shabbir ka paigham sunate hi rahenge
abbas alam tera utha'te hi rahenge

darya pe chidhi mashk kate bazuye abbas
seena hua dhuan tha sakina ki thi wo pyas
tooti kamar hussain ki zehne hui be-aas
chin jayegi sar se rida hogaya ehsaas
roodaad tishnagi ki sunate hi rahenge
abbas alam tera....

ladte hue darya pe gaye aun-o-mohamed
bhari thay hazaro ke liye aun-o-mohamed
takeed maa ki yaad rakhe aun-o-mohamed
pani na piye qatl hue aun-o-mohamed
jo zulm hue inpe batate hi rahenge
abbas alam tera....

pamaal ran may hogaya jis dam hassan ka laal
is gham ka khalbe shah pe kyon-kar na ho malaal
kehti thi umme farwa ke ay rabbe zuljalaal
ek raat ke dulhe ki hui laash payemaal
shab ki dulhan ka haal sunate hi rahenge
abbas alam tera....

barchi lagi akbar ko tadapne lage shabbir
pahunche jawan ki laash pe jab sarware dilgeer
zainab ki thi sada ke miti nana ki tasveer
kehti thi karbala may meri lutgayi jageer
laila pe jo guzri wo sunate hi rahenge
abbas alam tera....

haton pe sheh ke chidgaya masoom ka gala
roye tadap ke arz o sama aaya zalzala
zehra-o-mustafa ne lehad se ye di sada
bacha wo cheh mahine ka wo teere hurmala
guzri jo bezaban pe sunate hi rahenge
abbas alam tera....

sab qatl hue koi na tha sheh ka madagaar
jab khushk gala kaat chuka shimre bad-atwaar
naize ki ani par tha sare sayyade abraar
paighambaro zehra o ali thay jigar afkaar
tasveer karbala ki dikhate hi rahenge
abbas alam tera....

jalti hui reti pe pada laashaye be-sar
qaime haram ke jal gaye aur chin gayi chadar
ut'tay hue sholo may tha bemaar ka bistar
kurta bhi sakina ka jala chin gaye gohar
guzri jo yateemo pe sunate hi rahenge
abbas alam tera....

yun lutgaya ghurbat may mohamed ka gharana
rota hai jise sunke abhi tak ye zamana
kyunkar na bober likhe karbal ka fasana
milta hai najaf se usay lafzon ka khazana
gham aale payambar ka manate hi rahenge
abbas alam tera....
Noha - Abbas Alam Tera
Shayar: Mir Bober Ali
Nohaqan: Mir Bober Ali
Download Mp3
Listen Online